وبلاگ کلاس زبان هورامی دانشگاه پیام نور

فەرز کەرمێ هەورامی زوانەکێ بە هۆرەترێشقە هۆرتەقێنێ

ئارۆ ئیمە پسەو خەڵکوو هەورامانی، باس جە ویەردەی کۆن و وپەڕ پیتیما نمەکەرمێ، ئارۆ ئێمە داعیەو ئانەی نیەنمێ کە فەرهەنگما دەوڵەمەنا، ئارۆ ئێمە داعیەو ئانەی نیەنمێ کە ئینسانی هەورامی ژیروو زرنگا، پسەو کابرایێ خەڵکوو دەگاو (ئەسپەرێزی) "ئەفراسیاو ئەغگەر" وات، فەرز کەرمێ خەڵکوو هەورامانی بە هۆرەترێشقە هۆرتەقینێ، ئی هۆرتەقایە ئەر سرۆشتی بۆ ئەر خوایی هەورامیش درۆس کەردە بۆ، حەقوو ئانەیش هەن بە زوانوو ئەذاییش قسێ کەرۆ، ڕاو ڕاوینوو وێش بە ئازادانە هۆرچنۆ، بە زوانی هەورامی کۆو جەمە فەرهەنگی وکۆمەڵایەتیەکانە وێش برمانۆ، وێش بەروزۆ، وێش چەنی حەزوو ئارەز وئا چێوە کە وەشش مسیۆ وێ بەروزۆ، بە زوانوو وێش دەرس بوانۆ و تا وەختوو مەرگی تەنانەت جە ئاخرەتیچەنە مشیۆم بە هەورامیانە پرسوو وڵامش چۆ کەرا، ئی چێوا کە من واتێم حەقی سرۆشتی یەک دانە بنیاذمینێ، وەختێ ئێمە پسەو ئینسانی چەنی دنیایی(حیوانی) وێما جیا مزانمێ ، مەبەستما زوانا، پەس متاومێ ئینەی واچمێ کە جیا وازی ئینسانی و دنیایی فەقەت جە زوانینە بەروزیۆ و بڕێ چێوێ تەر کە پسەو خسلڵەت و جسموو ئینسان و حەیوانی کە جیا جە یۆینێ، گەرەکما چێگەنە ئی پرسێ ئۆ وێم کەروو کە ئایا ئەگەر من پسەو جوانێ هەورامی وەرم گێرا، و نازا بە زوانوو فەرهەنگوو وێم وەشیەکاو ژیوای وێم بەروزوو، ئایا لتمە مذۆ ئۆ وڵکۆتەی من، ئانە کە هەر ئینسانێ کە بە زوانی ئەذاییش بوانۆ وبنویسۆ خاستەر پیشرەفت کەرۆ چێوێن کە حاشاش چەنە نمەکریۆ، و فرەو جە دەروون شناسەکا و کۆمەڵشناسەکا، ئی چێوشا بە شێوێ ئاکادەمیک و سەردەمیانە سابت کەردەن، ئینە کە زوان کاریگەری فرەش سەروو گردوو بوارەکاو ژیوایوە هەن ئاشکاروو ڕۆشنا و پەنەواز بە باسوو من نیا، چێگەنە ئینە گرنگا کە من پسەو دانێ هەارامانی کە زوانوو فەرهەنگێ وێپام هەن چی مشیۆم دلێ زوانوو فەرهەنگەکاو تەرینە شۆریەوە(استحالە)، ئینە کە ئێمە خەڵکوو هەورامانی جە ئیرانەنە زوانما دلێ فارسینە نقم بۆنە چێوێ رۆشنا، ئانەیچ کە ئێمە جە هەرێموو کوردستانینە زوانەکەما خەریکا دلێ سۆرانینە نقم بۆنە، ئاذیچ پەڕ وازحا. باشە ئەی ئێمە باس جە ئینسانی ناتقیما کەردەن مەبەستما چێش بێ، باشە وەختێ تۆ نمازا بە زوانت قسێ کەری، وبە زۆرە ملێ زوانێ لایذەت پۆرە سەپنا، ئایا ئینە نیشانۆ چێشینە، ئایا ئینسانێ هەورامی پەیش هەن چی هەلوو مەرجەنە واچۆ من زوانوو فەرهەنگم هەن، بە دڵنیایوە نە، چوون زوانێ کە نەبەریشەنە کتیبیانە، نەبەریشەنە فێرگە، جە زانشتگانە قسێش پەنە نەکەری، نەکەریش بابەتوو پەیجۆرکاری جە زانشتەکاو دونیاو مدرنوو ئارۆینە، کەی مشیۆم نامێش بنیەی زوان،  زوانی هەورامی ئارۆ، پسەو مەردێوە کە گۆڕەفشار دریابۆ پاسەش پنە ئامان، هەڵبەت ئینە جە سایەو دەوڵەتوو ئێرانی و حکوومەتوو هەرێموو کوردستانی، و جە گردی گرنگتەر ئا هەورامیە کەزازا کە کۆتێنێ شۆنۆ ئی دوە دەسەڵاتەیە، فرەو خەڵکی ماچا تاریخ یا ویەردە قەزاوەت کەرۆ، بەڵێ من پسەو جوانێ هەورامی جە ڕاوینوو وێمۆ ئارۆ ئینەی قەزاوەت کەروو، کە ئا هەورامیا کە پەی ناسیۆناڵیزمی کوردی ودەسەڵاتوو ئێرانی هەرمانەشا کەردێنە، من کەزازشا چروو، ودلێ تاریخوو هەورامانینە بە خیانەت کار نامێشا پۆ گۆڕستانوو مەردەکانە منویسوو، تا زاڕۆڵەکاو هەورامانی، فرەتەر بشناسۆشاو و پیمانەشا کەرا، وەختێ ماچا ئینە نویسەروو هەورامانین، بەڵام وەختێ ملی کتێبەکاش تەماشا کەری بە زوانی سۆرانی و فارسی، ئەوەتاویاو زوانوو فەرهەنگوو هەورامانیش لاونانۆ، خەریکا ئینسان ترەکۆوە، ئاخۆر واچە برای بێ عەقڵ، نویسەروو هەورمانی ئانەنە کە بە زوانی هەورامی بنویسۆ نەک جەنابت، بە زوانوو بێگانا قسێ ماچی ئەو هۆرامانی، ماچا فڵانە کەس هەورامی زوانا هەن دلێ حزبوو....... تا ئیسە هەزار کەسێش کوشتێنێ، دەی واچە ئەحمەق مەر تۆ ڕەفێقوو خاڵخاڵینی یا هێتلێری و سەدامی، هەورامی چکۆو کوشتوو کوشتار چکۆ، ئارۆ زوانی هەورامی بڕێ نائینسانا بەردەن هەذوو سۆسۆڵاو لەرزای، کە بیەن بە دوشمەنوو گرد کەسی، حەر یاگێ وینی هەورامیێشا کەردەن بە سەرپل بەڵام وەختێ وینی ئنۆ کەزازێ حەقش نیا، پسەو هۆردەسی وەشەویسیما فەرماو زوانوو فەرهەنگوو هەورامی زوانوو شەڕوو کوشتوو کوشتاروو سەرەبڕیەو، مرافعەو جەهاد دای نیا زوانوو هەورامانی زوانوو وەشەویسی ئینسانەکان ئا ئینسانا کە مەدەنیەتی وزا وەڵ جە هەر چیوێ ، زوان هەورامی زوانوو ئاشتی برایەتی و زوانوو پشتیوانا جە هەژاران، نەک زاڵماو ون مجاو ڕۆزگری،

نویسەر: ژیار سڵامەتیان

3ئارگاو1392ڕۆجیاری

مەریوان